Тöрыт, 2022 вося январ 26-öд лунö мöдар югыдас муніс нималана коми гижысь, кывбур тэчысь, драматург, журналист, Коми Республикаса заслуженнöй уджалысь, миян театрлöн бур ёрт Николай Александрович Щукин. Сылöн поэмаяс серти пуктöма миян театрын медводдза мойд “Нагай лэбач” (1993 да выльпöв пуктöм 2013 воын), сы бöрын мойдъяс “Зарни сюра кöр” (1996 да 2021 вояс), “Нёрымö-дядьö” (2003), водевиль “Дачникъяс” (2016). Шог, кор мунöны енбиа йöз, кодъяс уна вöчисны да вермисны на вöчны коми культура, театр, литература сöвмöдöмлы. Николай Александрович вöлі шань мортöн, радпырысь век воліс спектакльяс вылö, паныдасьліс видзöдысьяскöд, лыддьысьысьяскöд. Театрса став уджалысь юкöны шогсö рöдвужыскöд да матыссаясыскöд. Югыдін да шоныдін Николай Александровичлы.
