Коми Республикаса вужвойтырлöн шылада-драмаа театр медводдзаысь пуктіс Шекспирöс коми кыв вылын. Июнь 17-öд лунö «Бушков» («Буря») спектакльлöн премьераыс прöйдитіс «Сыктывкар» концерта залын.
Спектакльсö пуктіс сыктывкарса режиссёр Лариса Иванова. Комиöдіс Шекспирлысь гижöдсö Ольга Баженова. Пуктассö мичмöдö шыясöн-шыладъясöн сцена вылын ворсысь оркестр.
Жанр серти «Бушков» — трагикомедия, но Уильям Шекспир пыртö сэтчö унатор. Пьесаыс похож и мойд вылö, и философскöй притча вылö. Дженьыда сюжетыс татшöм. Просперо, вöвлöм Миланса öксай, олö ді вылын да кужö кесйöдлыны вöр-ва вынъясöн. Сійö вермö кыпöдны бушков, мездыны гыясысь караб, ассьыс вöрöгъяссö туйдöдны-велöдны. Но, дерт, грека йöзöс мырдöн тшöктыны каитчыны сійö оз вермы. Но пьесаас эмöсь том геройяс, и ковмас эскыны, мый выль поколение кужас овны сöстöмджыка.
Тайö пьесаыс Шекспирлöн петіс 1611 воын. Бушков йылысь мöвпыс воис авторыслы 1609 вося лоöмтор бöрын, кор Бермуды діяс бердын пазаліс Дж. Сомерслöн караб. Во бöрын экспедиция йывсьыс гижисны, мый діяс вылас вöлöмаöсь повзьöдчана ловъяс, мутияс да ёмаяс.
Спектакль пуктысь режиссёр Лариса Иванова юксис аслас мöвпъясöн: «Дас öти во сайын пукті Шекспирлысь «Буря» Сыктывкарса «Фантастическая реальность» театрын. А колян ар 
Светлана Гениевна Горчакова вöзйис пуктыны сійöс комиöн шылада-драмаа театрын. Торъялöмъяс эмöсь, выль пуктасным лои ыджыдджык, ворсö унджык актёр, да и коми кывлöн ритмикаыс абу рочлöн кодь. Верма шуны, коми вылас юргö зэв лöсьыда. Кöть Шекспирöс артмас любöй кыв вылын пуктыны, сэтшöм сійö аслыспöлмс, вына. Думыштны кö, оліс сійö нёльсё во сайын, а öнöдз на выльпöв вуджöдöны, пуктöны театръясын. Быттьö эз морт гиж тайö пьесаяссö, а енлöн киыс нуöдіс. Вужвойтыр театрса артистъяслöн, чайта, артмис сунны Шекспирлöн драматургияö, кывны сійöс, гöгöрвоны. «Бушков» пьесаыслöн жанрсö стöча оз артмы шуны, тані Шекспирлöн став драматургиясьыс мыйкö да мыйкö босьтöма – и тешъясысь, и трагедияясысь, и хроникаясысь. Медшöр идеяыс тані – мый локтан олöмыс томъяс сайын, кодъяс состöмöсь, гректöмöсь, кужöны радейтны, аддзыны олöмсьыс бурсö. Шекспирлöн пьесаясысь «Бушковыс» — менам медрадейтана».
Паськыдджыка: https://mincult.rkomi.ru/burya-v-nacionalnom-teatre
